نصيحة أب لبنته ليلة زفافها

نصيحة أب لابنته ليلة زفافها

حبيبتي بنتي .. ياللى في جوازك الكـــــون لفرحي مـا يكفنيش

اليوم زفافك لبيت عريســـك عـــن جو طبعــه مـا تعرفيش

وعشان يحبك وتكوني زوجته وغاليـــة عنده مـا ترخصيش

حاقول نصيحة بس أسمعيها وحـياة عنيكــى مـا تقاطعنيش

عشان يا بنتي من غير مشاكل في بيت راجلنا عايزين نعيش

خليكى دايما وياه قنوعة وكوني راضية ما تطمعيش

وشئ ما يقدر عليه بلاش وأي مرهق ما تطلبش

وقولي دايما نعم وحاضر وفى المطالب ما ترفضيش

وفى كل ساعة أوامره طاعة وعنه نفسك ما تفضليش

عشان يا بنتي من غير مشاكل في بيت راجلنا عايزين نعيش

وكوني دايما أجمـــــل جميله وفى الــــــمرايه ما تهمليش

وأن شوفتى شكلك ما يكونش رايق قــــدام عيونــــه ما تظهريش

وتخللي ريحتك ريحة جناين والعطر عــــــندك ما تكسليش

وأتزوقى له 00 وأتعطرى له مدام لجوزك 00 ما يضركيش

عشان يا بنتي من غير مشاكل في بيت راجلنا عايزين نعيش

وأكلــــــه دايما تجهــــــزيه له وعن ميعاده متأخريش

أحسن يا بنتي الجوع ده مؤلم والبطن فاجرة ما بتختشيش

وأن نام شويه يرتاح له ساعة في وقت نومه ما تهيصيش

مش هو يبقى شقيان عشانك وفى وقت نومه ما تريحيش

عشان يا بنتي من غير مشاكل في بيت راجلنا عايزين نعيش

والبيت تحافظي عليه بعنيكى وفى كتر ماله ما تبعزقيش

وان جبتي منه عيال راعيهم وعـلـميهــــم ما تجهليش

وسره أوعى تقوليه لأبوكى عشان في عينه ما تصغريش

وبره بيتـــه لأهم طـارئ من قبل أذنه ما تخرجيش

عشان يا بنتي من غير مشاكل في بيت راجلنا عايزين نعيش

وان شوفتى جوزك زعلان شويه في هم وشه ما تفرحيش

وان كان مفرفش وجوه رايق فى صفو جوه ما تعكريش

بادليه تمللى ظروف حياته وكوني منه ما تفرقيش

وبين حماتك وأخت جوزك كوني محبه ما تكرهيش

عشان يا بنتي من غير مشاكل في بيت راجلنا عايزين نعيش

وان حد قالك كلام في حقه من غير عنيكى ما تصدقيش

وان غيرتي غيري عليه شويه مش غيرة نارها ما تنطفيش

ولو مشيتي في نور كلامي حاتعيشى طبعا وزعل مفيـــــش

والله يبارك ليكى في جوزك وتجينى زايره ما تغضبيش

وأنا تحت أمرك و أقول معاكى في بيت راجلنا عايزين نعيش

ولازم نعيش

كلمات الشاعر الحزين
علاء الدين